Ang Tula ng Trans* Para sa Mag-aaral ng Medisina

Minamahal kong mag-aaral ng Medisina,

Ilang araw mo na ako tinitignan

Mahigpit mo akong hinahawakan

Alam kong labag sa iyong damdamin

Ngunit kailangan mo akong unawain

Ilang gabi din ang ating pinagsamahan

Maraming gabing walang tulugan

Kahit na hindi mo ako lubos na maintindihan

Salamat at hindi mo ako sinukuan

Namasdan ko ang iyong pagsisikap

Saksi ako sa iyong pagpupursigi't paghihirap

Buong lakas kang nagtiyaga

Na aralin ang aking bawat pahina

Ngayon, napapapikit na ang iyong mga mata

Papasikat na kasi ang bagong umaga

Siguro'y dapat ka munang magpahinga

Maya-maya lamang ay sasabak ka na sa giyera

Dunong ang iyong armas at sandata

Mahihirap na tanong ang mga kalabang dapat itumba

Hangad ko ang iyong pagwawagi

Mag-aaral ng medisinang natatangi!

Nagmamahal,

Trans

*Ang trans ay daglat ng salitang transcription. Naglalaman ito ng lectures na itinuro ng mga propesor sa medisina. Bukod sa libro, ito ang kadalasang inaaral ng mga estudyante para sa kanilang mga pagsusulit.