Pusong Manananggal

6:27:00 AM

Image Source: http://www.zawaj.com/askbilqis/wp-content/uploads/2010/08/broken-heart-sliced-heart.jpg


Pusong Manananggal

 May kagyat na pagnanais na lumisan
Sa lunan na aking kinaroroonan
Nagtatalo ang aking kalooban
Mananatili o aalis nang tuluyan?

Hati ang isipan kung tuluyang iiwan
Ang nakaraang puno ng kasawian
Bagamat mahirap ay akin nang nakasanayan
Mamuhay ng mag-isa sa kadiliman

Ngunit mayroon din namang kagustuhan
Na tuluyan nang kalimutan
Ang madilim na nakaraan
At harapin ang maningning na kinabukasan

Mahirap makipagsapalaran
Walang kasiguraduhan
Na kayang mapagtagumapayan
Ang daan patungo sa paroroonan

Hati ang aking puso
Na tulad ng isang manananggal
Na nahahati ang katawan
Tuwing sasapit ang kadiliman

Ang bahaging lumilipad sa himapapawid
Ay sagisag ng kagustuhang lumisan
At maglakbay patungo sa lugar
Ng pagbabago at pag-asa

Ang paglipad sa kalangitan
Ay simbolo ng kalayaan
Mula sa rehas na dala ng madilim na kahapon
Nagbibigay ng pag-asa at bagong pagkakataon

Ang bahaging naiiwan sa lupa
Ay simbolo ng pangamba
At takot na tuluyang umalis
Sa lugar na minahal na ng labis

Bagamat mahirap ang nararanasan
Ang pananatili sa lupa ay may katiyakan
Mahirap sumugal sa "baka" at "siguro"
Dito na ako sa alam kong sigurado

Hati ang aking puso
Na tulad ng isang manananggal
Hangad kong magkaroon ng lakas ng loob
Na harapin ng buong tapang ang kinabukasan

Walang pangamba, walang takot
Walang agam-agam o pagdududa
May katiyakan at kasiguraduhan
Ganap at may kabuuan

You Might Also Like

0 comments

Twitter Feed